Òp zaoterdágmiddeg 2 mej kumt Veldeke Limburg nor Venroj um ur 100-jäöreg jubileum te viēre. Dan viendt vanáf 15 uūr òp ‘t bordés van de schowburg ‘n mánifestasie pláts waorbeej verschejjene ártieste van binne en bute Venroj eur dialekt laote huuëre. Beej slaecht waer wert ‘r uutgeweke nor de fwajee van de Venrodse Schowburg. Kring Venroj is den dág vertiggewórregd dur de groep Nòw Weej, ‘t trio Emma en Sofie Deters en Isa Linders (Ysselsteyn) en zánger Huub Janssen uut Wânssum. Van bute Venroj kumt ònder ândere Femke Philippens uut Simpelveld en Erwin uut Wahlwiller. Daornaeve kan ‘t pebliek ok mitdoēn án ‘n ludieke dialektkwis waorbeej leuke priēs te winne zien ‘t Pregrámmá duūrt zó’n 2 uūr en is vur iederieën graties toegánkelek.
Òp dees wiēs göt Veldeke Limburg òp toernee nevve al eur 10 lekale kringe ònder ‘t motto ‘Veldeke òp Pad’. Beej iedere kring zun ândere ártieste òptreeje, daels uut de pláts zelf en daels uut ândere regio’s van Limburg. Beej iedere kring wert ok ‘n spesjale jubileumpenning uutgerejkt án iemes den of die zich lekaal verdienstelek het gemákt vur ‘t Limburgs dialekt of vur Veldeke. Dees toernee vörmt d’n ánloeëp nor de groeëte jubileumviēring òp zaoterdág 23 mej ien ‘t Toon Hermans Theater ien Sittárd. Vur dees viēring zien alle leeje van Veldeke Limburg en eur ientroducees uutgenuuëdegd.